中環耳目：扮嘢文新寵Tokio Joe自創卷物
「蘭桂坊之父」盛智文出名瓣數多，而且識飲識食識享受，跟住佢「搵食」就最冇錯嘞。蘭桂坊控股旗下咁多間食肆餐廳，每間都各具特色，位於蘭桂坊十六號地下、開業逾十六載嘅日本餐廳Tokio Joe，更係老闆扮嘢文嘅「飛佛」。聞說Tokio Joe入面嘅新菜式，統統要過扮嘢文嗰關至可以推出市面。
鮮味融合 口感一流
Tokio Joe最出名莫過於佢哋自創嘅特色卷物嘞；四月推出市面嘅「火灸吞拿魚腩壽司」，正係扮嘢文嘅「新寵兒」。呢款壽司選用最靚嘅日本珍珠米，包住蟹肉同牛油果，外面仲用經過微燒嘅肥美吞拿魚腩包住。吞拿魚嘅脂肪滲入米飯，加埋新鮮蟹肉，各種鮮味融合一起，口感一流！扮嘢文同卓妮講，Tokio Joe 出品嘅卷物，好多都係只此一家，出面好難食得到。
Tokio Joe 嘅「西京燒鱸魚」都係其招牌貨。每一條鱸魚用一種獨特調味料「味淋」，加埋蛋黃同糖，醃足兩日兩夜，燒出嚟零舍香。Tokio Joe 經理Jimmy話，一般食肆通常用銀鱈魚燒，效果冇燒爐魚咁好喎。
Jimmy仲話，Tokio Joe 每次要推出新菜式前，都要畀唔同嘅熟客試味，收集意見再反覆改良不下三十次，當然要闖埋老闆扮嘢文最後一關先上市。