中環出更（一）：朱玲玲着旗袍簡潔凸顯禪味

「源」出一轍

朱玲玲本身係緬甸華僑，多年來好鍾意着旗袍，佢優雅嘅氣質，將「源」「簡潔、恬靜、和諧、純潔、含蓄、觸感、實用、舒適」嘅八大設計元素表現得淋漓盡致。朱玲玲嘅攝影作品中，好多都係影啲靜態花草，充滿禪味，正好同將「儒、釋（禪）、道」哲學思想引入現代時裝嘅楊生不謀而合，難怪多年嚟佢都被視為「源」嘅最佳演繹者。

問朱玲玲喜歡「源」啲乜？佢笑笑口話因為「方便」。着「源」嘅服裝確實幾方便，因為「源」唔會賣弄女士嘅身材，而係透過簡單設計，凸顯女性內在美。不過朱玲玲講嘅係另一種方便，佢話自己同「源」嘅老闆係好朋友，每次要出席重要場合，只要打個電話畀佢哋，就會安排到適合嘅旗袍畀佢；加上「源」用上等靚絲綢做，做工可靠又迎合到佢需要，最重要仲係有中國元素。

位於中環置地廣場嘅「源」，無論店舖設計同擺設都簡潔優雅，與佢哋嘅服裝設計同出一轍。 （楊歡成攝）

呢件改良式旗袍為朱玲玲度身訂造，裙襬嘅Laser-cut要喺瑞士用高科技剪裁。

莎姐讚襟着

朱玲玲囝囝霍啟剛都畀媽咪感染咗，依家都有着「源」，好似早前東亞運開幕，佢就着咗一件「源」贊助嘅中山裝示人。

「源」將絲打磨成「皮」，着喺莎姐身上一啲都唔俗套。 （葉華英攝）

陳曦齡用「源」嘅上衣自行mix & match，有自己嘅一套。

至於莎姐周梁淑怡同陳曦齡都係「源」嘅忠實fans，早前兩人出席中聯辦三八婦女節酒會時，不約而同着咗「源」嘅出品。家有百幾件珍藏嘅莎姐話，幫襯咗十幾年，鍾情「源」嘅靚料，一件衫着十幾年都仲好靚，不過佢謙稱着唔到旗袍，闊袍大袖嘅設計就啱晒佢。陳曦齡就話都有幫襯其他中國服品牌，但覺得「源」較適合佢，因為佢哋嘅設計簡單無花巧，令成熟嘅女士更添典雅。

卓妮