政情：IT豪為囝囝聽飛輪海
聽音樂真係好主觀，但始終唔同年代嘅人對音樂都會有唔同喜好，所以唔少「六十後」、「七十後」都對時下嘅流行曲冇乜共鳴。不過，非一般爸爸立法會議員譚偉豪（IT豪），就同班後生仔女同聲同氣，不但鍾意聽韓國人氣組合「東方神起」嘅歌，亦都好喜歡迷死一眾港女嘅台灣組合「飛輪海」，佢仲話聽多啲同囝囝溝通都好啲喎。
IT豪尋日出席音樂匯展開幕禮時，話自己平時好鍾意同囝囝一齊聽音樂，仲愛屋及烏，喜歡上囝囝嘅「飛佛」韓國組合「東方神起」添。IT豪話，好佩服「東方神起」又識唱日文歌，又識唱國語歌，仲提議本港歌星學好日文同韓文，他朝可以衝出香港市場喎。IT豪仲笑言，平時喺立法會太苦悶，得閒聽吓新一代嘅歌都係好事。
另一位立法會議員霍震霆同為人父，但就冇好似IT豪咁同囝囝一齊聽歌，仲講笑話自己鍾意嘅黑人樂隊The Platters，三位公子分分鐘聽都冇聽過添，而佢哋鍾意聽嘅歌，自己都未必認同喎，總之各自各精彩啦！