政情：林煥光扮cool抗拒誘惑
前特首辦主任、現任平等機會委員會主席林煥光當年因為被傳媒揭發與「紅顏知己」把臂同遊日本，疑似婚外情最終令佢要黯然辭職，件事大家至今記憶猶新。林煥光尋日上電台時話，當一個人有權有勢嘅時候，外面嘅人就好想影響你，明刀明槍行賄、貪污反而仲容易抗拒，相反有時同身邊嘅人太熟、有好感，自己就好容易唔覺意中招。
林煥光話，當公職愈做愈高嘅時候，身邊唔經唔覺就會出現好多誘惑，所以佢依家學精咗，警覺性好高，寧願對人冷漠啲，對人對事cool啲，都唔想踩界咁話。不過，對於感情嘅誘惑，唔知林煥光依家有無學精咗呢？
成日畀人批評「大花筒」嘅平機會，依家由佢領導，林煥光話其實平機會內部已經有好詳細嘅規則指引，只係可能有時執行起上嚟唔係咁小心，先至會出事。佢繼續硬銷，話自己好慳家，應該唔會有問題，亦會同班同事合作提高工作效率，相信平機會會愈做愈好。