政情：馮康擺春茗請食盆菜

講到食盆菜，馮醫生雖然唔係原居民，但佢都好識食，佢話食盆菜唔好咁斯文，一定要「起底」，將盆菜最底層翻出來，因為呢啲食物先至最入味、最好食。馮醫生唔算大食，佢坐嗰圍枱摷晒底食咗大半盆，就宣布投降。

馮醫生作為主人家，盆菜宴後仲安排餘興節目，介紹祠堂特色，佢充當旅行團領隊，由村長當導遊，講解圍村多個景點。原來粉嶺圍嘅彭氏宗祠有一百六十幾年歷史，係香港一級受保護建築，而粉嶺圍發展至今，仲保留部分圍村嘅圍牆。