政情：愛駒赴日出戰 林大輝嗌乸脷
立法會議員林大輝近年馬運亨通，愛駒「極奇妙」更衝出香港，本月廿八日出戰日本高松宮紀念盃，競逐高達一百萬美元獎金。獎金咁豪，邊個馬主唔心動，但大輝就慨嘆出門使費不菲，僅支付馬匹保險費、騎師及馬伕嘅機票及住宿費，閒閒哋要使二、三十萬蚊。
大輝尋日出席喺會展舉行嘅香港工商界商會新春團拜。講起出戰日本，大輝謙稱「極奇妙」實力屬次一等，贏面唔算高，但話晒係愛駒首次代表香港參加國際賽，當然要把握機會為港爭光。「極奇妙」十八日飛抵名古屋，大輝唔止陪伴左右，仲拉埋幾個老友去日本做啦啦隊，住宿由佢包底。
講番尋日個酒會場面墟冚，五十三個工商界商會聚首一堂，來自唔同陣營嘅工商界立會議員都有出席，好似梁君彥、林健鋒、方剛及林大輝更有出席。籌委會主席葉紀章話，過去一年，工商界面對前所未有嘅金融海嘯，營商環境唔明朗，僅靠工商界獨自努力唔係辦法，政府都要幫吓手，協助尋找轉機至得。