中環出更：羅慕玲揹a.testoni袋奶白優雅
維他奶集團非執行董事羅慕玲（Yvonne）係維他奶執行主席羅友禮胞妹，佢平時好少喺香港蒲頭，皆因佢負責打理美國市場，至今已經廿幾年。早前集團歡度七十周年，佢特登由三藩市返嚟，仲盛裝出席酒會，一身打扮春意盎然。
三月天氣時冷時熱，Yvonne一於好少理，卓妮見佢着咗件好有春天氣息嘅連身外套，側揹a.testoni小巧精緻嘅奶白色真皮手袋，整體感覺好柔和，同佢嘅燦爛笑容好襯，腕間再搭配隻Cartier鑽錶，夠晒優雅高貴。Yvonne聽到卓妮讚佢好開心，話集團七十歲生日咁開心嘅日子，梗要悉心打扮赴會。
a.testoni奶白色手袋令到Yvonne顯得更加精緻輕巧，意大利a.testoni已經有八十一年歷史，佢哋一向以精湛嘅手工藝聞名，尤其係運用稀有皮革，例如鱷魚皮、蜥蜴皮等。
Yvonne品味一流，做生意一樣好出色。佢原本係讀城市規劃嘅，但三十年前被父親號召歸隊，負責創辦美國公司。依家集團營業額中嘅兩成來自美國，Yvonne真係叻女。