中環出更：雷林靜怡ifc掃有機食材
曾經活躍於社交界嘅九巴新抱雷林靜怡（Jane），自從生咗三個小朋友後，疊埋心水做全職媽咪。咁啱得咁蹺，上星期四傍晚約五時半，卓妮就撞到Jane出現喺ifc國金商場嘅City'Super超市掃貨，買咗有機雞肉、蔬菜等健康食材，果然係稱職家庭主婦，難怪佢老公九巴家族後人雷兆光（James）錫到佢燶。
當日Jane着得有型有款，短身皮草中褸襯貼身長褲，再加上保暖嘅平底軟身中靴，成個型女Look頗引人注目。佢好匆忙咁嚟到名人鍾意幫襯嘅City'Super，集中精力喺雪櫃附近流連，期間不停咁講電話，講到畀晒錢離開為止。
短皮草保暖靴
City'Super依家推廣緊有機食物，Jane喺擺放美國有機雞肉嘅雪櫃前面逗留咗好耐，仲拎起仔細研究。超市貼出嚟嘅招紙強調啲雞無附加賀爾蒙同抗生素，又用全天然飼料飼養，啱晒身嬌肉貴嘅名人貴族需求，所以Jane都買咗唔少。
Jane又喺擺放日式烏冬同埋冷麵嘅貨架嗰度徘徊，仔細端詳後都攞咗幾袋入手推車度，睇嚟佢都幾鍾意日本嘢。
只消短短二十五分鐘，Jane已經買咗兩大袋嘢，重到佢拎唔到，結果要超市派出個後生仔幫手拎到樓下，同喺樓下待命嘅司機會合後，一齊搬上私家車後座揚長而去。
依家潮流關注健康，有機食品備受追捧，Jane咁識得為家人健康着想，真係唔話得。卓妮記得兩年前James高調慶祝同太太結婚十周年，仲送咗條逾十卡嘅黃鑽頸鏈畀老婆，氹到Jane甜到漏。今年六月就係兩人結婚十二年，唔知佢哋諗住點慶祝呢？
卓妮