拍卡位無上蓋司機淋雨
顏先生為藍田德田邨停車場A場車位租戶，不滿停車場拍卡出入口位置設於室外，令駕駛者飽受日曬雨淋之苦。顏坦言已多次向領匯反映，卻不得要領，「出入停車場都要拍卡，但個位就冇瓦遮頭，落親雨就算唔落車都淋到半邊身濕晒，已經同領匯講咗好多次，點知仲係冇人理！」顏促領匯正視問題，改善轄下設施以方便租戶。
當區區議員柯創盛批評領匯對問題多採「拖字訣」，未有認真處理，「我自己都成日將架車泊喺嗰度，好多車主都話個露天出入口有問題，年幾前已經要求領匯改善，但係佢哋聽完就算！」柯促請領匯盡快加裝擋雨設施，免卻停車場車主再受困擾。
對於被指摘遲遲未有回應租戶要求一事，領匯發言人未有詳細解釋，只稱將就停車場入閘機加裝雨檔設施的可行性進行研究，惟時間表仍然欠奉。