政情：陳健波梁美芬恨生女
傳統中國人重男輕女，不過時代唔同晒，連我哋嘅立法會議員都係恨生女多過生仔。已經有兩個囝囝嘅保險界議員陳健波話，身為爸爸始終都好恨有個女，一嚟女仔通常貼心啲，又識得嗲爸爸，同女講嘢會開心好多，加上女仔比較識照顧父母，唔怕老來無依。不過波哥話生女會有個擔心，就係驚佢嫁錯郎。雖然佢好恨有女，但健波話暫時冇意追番個女。
恨女嘅議員仲有專業會議梁美芬，同樣有兩個囝囝嘅梁美芬，早前開宗明義同我哋講想追番個女，因為終於「時機到」。佢話生咗兩個仔之後，本來都想生女，不過兩個囝囝一直都話唔鍾意，搞到梁美芬好頭痕。到近期佢兩個囝囝終於唔抗拒有妹妹，佢同老公傾完都話不如計劃生番個。
不過生仔生女呢家嘢，講彩數之餘仲要講基因，話就話機率係五十五十，不過命運有時好難講，如果想追女後來又生個仔，兩位又點打算呢？