葉劉要求津貼五成開支
喺上周五立法會內務委員會上，獨立議員葉劉淑儀提出抗議，話要議員拆街板個荷包好傷，要求政府資助，唔少建制派議員都牙痛咁聲。有見及此，政府決定暫時唔使議員拆街板住，等下周五（十九日）政制事務委員會討論完再算。
不過循規蹈矩嘅葉太一早請咗人拆街板，粗略計算盛惠三萬七千幾蚊，依家政府話暫緩執行，葉太大嘆係無妄之災，要求政府最少津貼五成開支。自由黨主席劉健儀就決定不遷不拆，佢話呢次五區補選令全港九新界嘅議員都要拆晒啲街板，十分唔公道，尤其佢係功能組別議員，無理由地方選區補選都要佢讓位，佢提議喺唔好郁動現任議員街板下，另覓位置畀補選參選人喎，睇嚟單嘢仲有排拗。