政情：豬仔團引爆旅界內戰

立會議席前哨戰

菲律賓旅行團被人賣豬仔，即刻成為旅遊業內爭取表現嘅機會。旅遊界立法會代表議席原本係自由黨嘅禁臠，○八年被阿Paul攻陷後，自由黨一直韜光養晦，儲備彈藥，打算兩年後上演武士復仇。與此同時，脫離自由黨後另起爐灶成立經濟動力嘅「3L」，亦欲擴展政治版圖，覬覦旅遊界議席，舊年支持胡兆英拿下自由黨老巢旅議會，諗住二○一二年再下一城爭奪立法會議席，而謝偉俊亦要保住依家個位，旅遊界戰國三雄，磨拳擦掌，一次菲律賓豬仔團事件，觸發三方正式交手。

阿Paul前晚搶韁截胡，率先接觸到豬仔團旅客，但佢無第一時間通知對口單位旅議會，反而走去搵協助佢當選議員嘅恩師、香港入境團旅行社協會主席侯叔祺，借助恩師人脈，為豬仔團搵到暫時安身之所。阿Paul截咗人胡，仲要打對手一拳，爆料話前晚搵過多個部門，全部幫唔到手，阿Paul噏咗一堆名字，其中兩個就係胡兆英當家嘅旅議會同田少做主席嘅旅發局，莫非阿Paul想隔山打牛突襲政敵？

畀人殺埋身，胡兆英同田少尋日拿拿臨出招自保，胡兆英一早帶住旅議會總幹事董耀中等一大班人去安撫班豬仔團團友，安排團友尖沙咀購物，又幫手搵酒店，旅發局就請團友上山頂免費享受豐富午餐。旅議會同旅發局又澄清，前晚都收唔到求助電話，唔知係咪暗寸阿Paul講大話。旅議會同旅發局行動迅速，明顯唔想事件鬧大，不過，胡兆英同田少最焦急嘅，梗係盡快化解阿Paul嘅攻擊，喺一場豬仔團戰役中輸少當贏，扭轉劣勢，博嚟緊幾日反敗為勝。

二○一二年立法會選舉尚未進入埋牙肉搏階段，旅遊業內各據一方嘅阿Paul、胡兆英同自由黨核心之間，經已戰雲密布，火藥味濃，可以預見，未來兩年類似事件陸續有來，大家擔定櫈仔等睇好戲啦！