中環出更（一）：朱玲玲為攝影唔敢Gel甲

朱玲玲搖身變成攝影家，並非得個講字。月前佢攞出四十幅超水準之作拍賣，僅一幅《蝶戀花》就拍得高價一百萬元。呢批作品尋日首度公開，吸引城中攝影名家及多位前港姐現身撐場，包括前港姐冠軍、高球好手鄭文雅。

鄭文雅尋日身穿購自印度嘅民族裙現身撐朱玲玲。

老公羅康瑞由北京趕返香港撐場，不過就遲咗三個幾鐘。 （嚴少阡攝）

爆啟剛冇咁早結婚

朱玲玲影相十六年，水準媲美大師級，佢話秘訣係不停影多啲，依家每星期仍然跟老師陳紹文上堂。朱玲玲獨沽一味鍾意影大自然，特別係花朵，佢話齋影梅花已五年，荷花就影咗十年，蝴蝶都影咗三年。花開花落，朱玲玲都心中有數：「二、三月去南京影梅花最正，六月去越南或者元朗影荷花最好。」

為影靚相，朱玲玲犧牲大，每次揹住四、五支鏡頭及主機出門，搞到腰骨痛，就係玉手被三腳架夾瘀咗，佢話Gel甲都唔敢整，因為按唔到相機掣。

卓妮問朱玲玲會否幫大公子霍啟剛影婚紗相，佢甜笑話啟剛冇咁早結婚：「我唔急於飲新抱茶，呢個係囝囝嘅緣分。」即使他日做奶奶，都唔想揸機，寧願高貴啲坐定定。

講番個攝影展，朱玲玲尋日由頭撐到尾，獨欠老公羅康瑞，原來佢身在北京開兩會，搞到姍姍來遲，遲咗三粒幾鐘先亮相，羅生呷醋話，太太晚晚匿埋房間執相執到兩、三點，冷落咗佢喎。

今次攝影展由尋日起喺太古廣場公開展出，直至三月十六日為止。除咗睇相，仲可以買番本輯錄咗朱玲玲今次展覽嘅限量紀念攝影集，每本五百二十元，收益將資助渣打銀行旗下「看得見的希望」計劃，喺中國推動復明行動，幫助有眼疾嘅人。

卓妮