政情：高浩文冧莊繼續低調
香港大律師公會剛剛換屆，上任主席高浩文喺無對手之下成功冧莊。尋日佢帶埋一班新嘅執委出嚟見記者，對於敏感嘅政治議題如《基本法》廿三條立法同埋立法會補選，佢實行唔撐唔踩、保持中立。
其實兩年前嘅公會主席袁國強獲委任做廣東省政協委員，一度引起唔少回響，令人以為公會變天。結果時間沖淡咗一切，公會主席亦由舊年開始換上高浩文，不變嘅只係佢兩人低調嘅作風。
補選投票賣關子
尋日高浩文被問到廿三條立法嘅問題，佢只係話若然港府真係立法，公會會睇清楚法例條文然後畀意見。至於近期政圈話題仲有愈搞愈無聲氣嘅所謂五區「公投」，高浩文就認為任何人都可以自行將呢場補選講成任何嘢，補選結果亦任君演繹，總之只係一場補選咁話，至於會否喺補選投票，佢笑笑口向大家賣個關子就算。高浩文答得咁小心翼翼都不無道理嘅，事關前車可鑑，稍有差池惹嚟意見就唔好啦！