中環耳目：上海總會雞燉翅六叔都話正
中國人無翅不歡，講到食靚翅，上海幫有自己地頭，就係坐落中環雲咸街嘅上海總會，一味燉足七粒鐘嘅「火朣雞燉大排翅」，連電影大亨邵逸夫、全國政協常委陳永棋同上海總會副理事長李德麟都係食過翻尋味。
上海總會以烹調正宗上海菜深得名人歡心，開業三十年，身為該會永遠名譽會長嘅邵六叔經常嚟幫襯。上海總會理事長王緒亮話，六叔幾乎每月都嚟大擦上海菜，月前同太太方逸華拍拖開餐，六叔堅持行兩層樓梯上會所，一坐低就點咗味招牌菜火朣雞燉翅。
來自揚州嘅總廚煮翅有秘方，以廿八両上等翅加埋嫩雞及一斤重上海金華火腿清燉而成。窩翅一上枱已翅香四溢，每條翅如筷子般粗。據聞六叔愛食金華火腿多過魚翅，仲要點多一味東坡肉送飯。呢度嘅東坡肉，以靚五花腩加上冰糖及醬料炆足兩粒鐘，肉質又腍又香，六叔唔怕肥，一於歎多幾舊。早前上海總會豪派利是一百二十萬蚊畀老人家做善事，仲請埋佢哋食招牌菜，當然唔少得火朣雞燉大排翅啦！