白蟻佔公屋四口家徬徨

記者：梅可茵

白蟻在廁所瓷磚罅隙蠕動，令人毛骨悚然。	蟻路穿過廚房與廁所之間的空隙，再伸延至污水渠。	住戶分別在廚房及廁所渠口附近發現無數白蟻。

位於葵涌的荔景邨樓齡約三十五年，張先生（化名）一家四口今年二月初獲配該邨樂景樓一個低層單位，早前往新居「拜神」期間，發現廚房渠口及廁所牆腳「有嘢郁郁吓」，細看下原來正有數十隻白蟻在蠕動，「房署話完全唔知間屋有白蟻，但係我聽隔籬屋講，話上手屋主啲傢俬都爛晒。如果房署唔係隱瞞就係驗收有問題！」張擔心蟻患會進一步入侵新居其他地方，最終影響一對年幼子女，要求房署重新配屋。

職員欠知識 蟻患恐蔓延

記者上門檢查蟻蹤期間，發現單位表面並無蟻患迹象，在戶主指示並細看下，終見有一條呈深啡色的「蟻路」，有逾廿隻白蟻正沿廚房渠口走向廁所，狀甚惡心。

公屋聯會主席王坤質疑負責驗收單位的職員缺乏經驗或專門知識，差點令蟻患蔓延，「白蟻咁細隻，唔係單憑影相或者上門睇睇，就知道喺唔喺度，如果唔係使乜搵白蟻專家？畀佢走埋過其他單位仲弊！」王建議職員驗樓時由專業人士陪同，或加強內部職員培訓，避免問題再現。

議員指程序出錯促檢討

「我好懷疑房署依家嘅驗收程序好有問題，有乜理由要居民收咗樓先發現有事？」立法會房屋事務委員會委員王國興指出，過去房署因為驗收問題，屢次跟居民出現摩擦，建議全面檢討現有驗收項目及程序，「白蟻唔單止影響一戶，仲可能牽涉上下層同埋鄰居，如果可以喺驗收之前發現，成件事就冇咁複雜！」

對於涉嫌隱瞞單位存有白蟻之指控，房署發言人未有正面回應，只解釋工程人員翻新有關單位時，並未有發現白蟻。及至去年十月底完成翻新工程，職員再於十一月接收單位時，亦有在現時出現蟻蹤位置拍下照片，當時亦無白蟻。發言人重申，現已為單位完成滅白蟻工序，不會為住戶重新編配單位。