笑看天下:驗毒一開始就失敗

大埔校園驗毒試行計劃推出時,老朽一早就批政府草率強行,準備欠周詳,必衰!而校園驗毒,何須政府越俎代庖,交給最熟悉該校學生的老師校長去搞就掂。如今花了大筆公帑,出來的結果令人啼笑皆非。

一方面,警方日前先後在屯門、旺角拘捕五名十多二十歲青年,搜出一千二百克俗稱「K仔」的氯胺酮;另一方面,發表禁毒處委託獨立顧問公司進行的《二○○八\○九年學生服用藥物情況調查》,出來的結果是「在一百一十二間受訪中學中,一百一十一間表示有學生曾經吸毒」,嘩!即係有九成九學校有學生吸毒,情況豈不是嚴重過清末民初國人吸食鴉片煙?開始見到有論者懷疑這類調查的準確度,皆因問卷是保密及匿名,且學生「玩嘢」亂填的心理普遍。講真,老朽答親呢類問卷,自問十句都有一句真,是以準確與否,大家心照喇!難怪嗰位作者調侃,如果你問有幾多人食過屎,結果可能有六、七成學校有人「食過屎」!

有些問題,係永遠調查唔出真相嘅,好似你問啲高官,有冇憑良心做事吖?十個有九個話有,還有一個話係惡心!又譬如你問教師有冇愛心,一萬個一萬個都話有,卻有九千個內心在嘀咕:一入師門深似海!

言歸正轉,校園驗毒去年十二月推行,參加者百分之六十一,結果一個陽性反應都冇,咁是否證明他們都有了「良民證」,而餘下的百分之三十九,難道會被歧視是有機會的濫藥者?

曾蔭權與禁毒專員如死撐大埔校園驗毒試行計劃成功,卻又不肯推廣至全港,那就是為德不卒。