政情：甘威金刀梁睇死鬍鬚曾冇料到

新物業皆位處中西區

甘威之前租住西環巴丙頓道某單位，同好多香港人一樣係無殼蝸牛，但係喺一月十四日，佢向立法會秘書處申報，「喺港島擁有物業」，終於進身有樓階級。依家樓市咁熾熱，甘威竟然都夠膽入市，佢解釋，不滿舊居不斷加租，咁啱見隔籬單位出讓，於是以呎價七千幾蚊買下，以後唔使捱貴租。甘威新居一千餘呎，㩒一㩒計算機，即係分分鐘要八、九百萬元。金融海嘯，甘威損手爛腳，兩年唔到，咁快一擲千萬買豪宅，從政唔通真係咁好搵？

我哋問甘威，點解咁肯定唔怕預算案會有新招打擊樓市，佢話，一早估到鬍鬚曾嘅出招軟弱無力啦，政府點會落重藥㩒樓價吖，大家咪傻啦！

人稱「金刀梁」嘅梁智鴻，本身喺香港已經有五個物業，四個自用，一個出租，翻查佢喺二月二日向行會提交嘅申報，發現佢同太太最近又入市買貨。金刀梁嘅申報指，新物業為妻子擁有，用作出租，值得留意嘅係，梁太同甘威投資眼光好接近，新物業亦係位處中西區。甘威信唔過鬍鬚曾遏抑樓價招數，港府就話可以賴一句「反對派為反對而反對」啫，金刀梁身為行會成員，屋企人一樣對樓市後市樂觀，鬍鬚曾仲有乜嘢好講？

有人辭官歸故里，有人漏夜趕科場。甘威同金刀梁入市買樓，保安局局長李少光就喺二月二十四日通知行會秘書處，刪去元朗嘅物業紀錄，即係將層樓賣咗。光哥同妻子喺香港共同擁有兩個住宅物業，都喺沙田，一個自用，一個家人住用。根據行會申報文件，光哥最近將名下一個位於元朗嘅住宅物業成功出售，不過，呢個單位光哥只擁有一半業權，由母親與兄弟所住，所以光哥賣樓，可能基於家人決定，未必與樓市走向有關。