中環耳目：西苑爵士湯源自鄧肇堅

講到食嘢，鄭生鍾意食有特色嘅菜式，唔一定要係貴價食材，推介首選係銅鑼灣利園二期西苑酒家，盛讚佢哋嘅爵士湯、杏汁花膠豬肺湯一流，蠔皇叉燒包、雪影杏汁包亦值得一讚。

鄧肇堅爵士（穿唐裝者）愛西苑有相為證。 （圖片由西苑提供）

西苑多種菜式，鄭國屏都鍾意。 （何偉雄攝）

西苑集團董事李文龍話畀卓妮聽，鄭生推介嗰幾款菜式都係老饕之選。名字怪異嘅爵士湯原來有段古，廿幾年前鄧肇堅爵士同西苑老細古國華好老友，鄧爵士喺幫襯之前，好多時會提前派人送來煲湯材料，後來古老闆得到鄧爵士同意將湯嘅「版權」公諸於世，並命名為爵士湯，湯料包括花膠、螺片、老雞等，最特別係落埋美國蜜瓜，所以有生果清甜味。至於每日分早、午、晚三次炮製嘅大哥叉燒，則因影星成龍鍾意而得名。