歧視令人俗，香港政府卻帶頭歧視煙民。起初還溫和些，甚麼「食咗煙唔好掂我」，大佬啊！依家食支煙啫，為何當正人哋好似有痲瘋愛滋病？對患有愛滋病患者，都請姚明拍廣告叫人唔好歧視，對吸煙者卻好似要五花大綁去浸豬籠，「我對自己肺部不忠啫」，使唔使咁啊？

有好煙民寫信畀「豈能盡如人意」但問心「無愧」的鬍鬚曾，指控煙辦有個宣傳片好鬼誇張：小女孩看見有人抽煙，打電話舉報：「嗰度有人食煙啊！」語氣活像她目擊兇殺案。尤有甚者，把抽煙者拍成猥瑣惡霸形象，使市民視吸煙者如同麻原彰晃，一去到有煙味嘅地方，彷彿進入毒氣室。

鬍鬚曾，從數字上見到加煙草稅，只能為庫房帶來少少的額外收入，這說明煙草稅難成為開源途徑，況且又未增戒煙成效，反而走私煙大增近七成；如今又話封殺免稅煙，咁搞法除了趕絕免稅店，令私煙更猖獗，亦剝奪人權！坦白講，煙民大多不懼死，無謂再用恐嚇的手段了！吸煙者大多是成年人（學生已轉軚去吸毒），食唔食，由得佢哋自己決定吧！

坦白講，吸煙者不乏普羅大眾、工人階級，他們愛「飯後一支煙，快活勝神仙」，這其實亦是一種紓緩減壓的方法，封殺免稅煙，哪來關愛？