女性從政似乎已經係香港一個大趨勢。立法會秘書處尋日發出統計數字，女議員雖然只佔全體議員百分之十八，但工作量就一啲都唔少。喺立法會三個常設委員會入面，兩個都係由女將做主席把關；十八個事務委員會當中，百分之二十二由女將做主席，而廿一個法案委員會當中，女主席嘅比例都有近四分一，統統都比女議員嘅比率為高。睇呢啲數據，可以想像女將們嘅勤力程度。
立法會內唔少棘手事件都係由女議員搞掂，好似之前搞到滿城風雨嘅高鐵撥款，財委會主席劉慧卿畀泛民同建制兩派一齊夾擊，最後都可以順利解決，卿姐少啲耐力同牙力都搞唔掂。調查甘乃威是否求愛不遂怒炒女助理一事亦一樣，大家左推右避，最後都交咗畀梁劉柔芬（Sophie）為首嘅獨立調查委員會處理。
雖然男議員功勞不可抹殺，但早前一個調查話，提動議或修訂案最少嘅五個議員全部係男性，睇嚟男議員如想威番次，要落力啲嘞！