點樣可以與港大校長徐立之零距離接觸？簡單寄封email就得！話說一名台籍美國女碩士生忽發奇想，以「校長一日的工作」做畢業報告題目，於是寄封email畀徐立之要求跟佢一日，結果卅六小時內就成功得到校長首肯，做一日「校長影子」，形影不離！
呢位三十歲、美國伊利諾大學香檳分校嘅教育碩士生陳小靖，趁假期到香港旅行，初四寄封email畀校長，估唔到校長咁快一口答應，邀請佢一齊出席尋日嘅傳媒新春聚會，搵埋車接佢，仲為佢冠名「校長影子」。徐立之話今次係第一次有外國學生跟住佢，好新奇，仲讚「My shadow is prettier than me（我個影子仲靚過我）！」
小靖全程跟實校長，睇住校長招待嘉賓、與傳媒對答等等，驚嘆校長腦容量特大：「大學有這麼多發展計劃，用多少錢、幾年建好等，他全部記住了！」佢仲大讚校長手腕柔中帶剛，對答流暢。其實徐校長仲好孝順，新春有四日假，佢就飛咗去多倫多向母親大人拜年，機票、租車錢好貴，都幾肉赤！