尋日年初十，自由黨喺尖沙咀國際廣場舉辦新春團拜晚會，前主席「田少」田北俊、其胞弟田北辰、三位正、副主席劉健儀、張宇人同方剛，以及前副主席莎姐周梁淑怡成班新舊核心高層又可以相聚一堂，今年最特別嘅，係場內多咗一批八十後嘅年輕地區幹事新面孔，令自由黨當堂年輕化咗唔少，顯示自由黨過去一年地區工作漸見成績，開始開枝散葉嘞！
自由黨經歷過○八年立法會選舉重挫一役後，今年已經係第二個農曆新年，自由黨呢兩年嚟多咗唔少新面孔，除咗瞓身黨務嘅「二少」田北辰之外，尋晚仲多咗一班年輕面孔，一問之下，原來全部都係自由黨嘅地區骨幹，睇嚟自由黨話要開拓地區工作，今次真係有啲決心。
自由黨尋日相當忙，晚上搞晚會，朝早就浩浩蕩蕩去西環中聯辦拜年，田少等人晨早九點已經喺七號差館對面嘅明星酒樓集合，其他自由黨區議員同地區骨幹成員陸續到齊之後，一支六十人龐大拜年隊伍直入中聯辦拜年，仲逗留咗成粒鐘。