歎下午茶已成為港人生活一部分，大家如果唔想獨沽一味食件腿蛋治，不如學吓華商會所主席黃守正咁，食番件會所餐廳出品嘅「蝦多士」。黃守正話，唔係賣花讚花香，上任做主席以來都唔知餐廳有款鎮店之寶，半年前聽會所名譽會員范徐麗泰極力推介，先知道正斗美食原來近在咫尺。
黃守正娓娓道來，話佢哋嘅「蝦多士」係用越南虎蝦加新鮮麵包炸成，食時點埋他他汁，入口香脆而不膩，甚少食下午茶嘅黃守正都話一試難忘，佢鍾意邊食「蝦多士」邊歎多杯特製咖啡。呢度嘅咖啡用上多種咖啡豆溝成，味道濃淡適中，不帶苦澀味。咪以為喺高級會所食下午茶好「乸脷」，柯打一份「蝦多士」同咖啡只係三十九蚊，絕對係街坊價。
不過會所餐廳只招待會員，想品嘗「蝦多士」就要搵會員帶路至得嘞！