香港四大商會之一嘅中總舉辦春茗，政商界人頭湧湧。中總自從由蔡冠深擔任會長後，力求年輕化，○八年十月領導層換班時，一口氣換入多名年輕副會長，蔡冠深咁落足心機，卓妮八到，年底換屆佢好大機會再冧莊兩年。

楊釗喺金融海嘯前一股不留而自嘲為「神經富豪」，佢話今年股市波動，宜小賭怡情。 （徐家浩攝）	（左起）方文雄及父親方潤華齊現身中總酒會，初登《福布斯》香港富豪榜嘅方老先生，謙稱自己唔係咩富豪。右一為前中總會長陳有慶。	黃宜弘（左二）兩年後勢卸任中總立法會代表，除咗方文雄，有傳黃英豪（右二）及廖長江都係接棒人選；右一為中總青委會主席曾智明。

上半年要「四保」睇定啲

生意人碰頭，兩句不離經濟。方潤華同卓妮講，虎年香港經濟主要睇四樣嘢：中國收緊銀根、歐洲經濟危機、美國退市步伐同中美局勢發展，一切要到第三季先至真正明朗化。所以，佢話上半年大家嘅股市策略記緊要「四保」：保守、保本、保險同保健康，即係叫大家先忍手，後出擊。身兼中總副會長嘅方文雄，同父親方潤華策略一致，認為股市波動大，揀股要小心，糖、鋼材同金屬一類嘅資源股較穩陣喎，但佢認為今年情況較為樂觀。

本身係新華集團主席嘅蔡冠深，家族以海產生意起家，近年進軍地產、金融同科技產業，佢都話相信各國政府嘅退市步伐唔會太急，香港雙底衰退機會唔大，不過，佢奉勸股民喺上半年最好睇定啲先。至於樓市，佢笑言唔識答，事關近日政府賣地高開，「麵粉貴過麵包」，熾熱樓市會否降溫，天曉得！

「褲王」楊釗分析虎年經濟格外理性，話分兩個層次睇，搞實業嘅OK啦，應該無問題；投資股票嘛，大家就要量力而為，睇餸食飯，始終股市波動風險喺虎年未除，小注怡情嘅投資哲學今年最適用。至於「新金王」黃英豪則睇好本行，話各國政府要退市，談何容易，息口應該繼續低水位，黃金市場繼續有價有市，買金買得過，賣花讚花香！

卓妮