自由黨副主席張宇人（Tommy）喺農曆新年去紐約度假兼探外孫仔，悠悠閒閒湊孫為樂，快哉樂哉！Tommy尋日同傳媒新春聚會時話，唔係次次假期都有美好回憶，有啲甚至係噩夢，好似○八年九月歐遊，因為要不停越洋回覆香港記者電話，長途電話費高達五位數字。佢一面講，一面除眼鏡抹眼，襯晒佢一殼眼淚嘅主題。
○八年九月到底發生乜嘢事，令香港記者瘋狂越洋追瘦Tommy呢？咪係自由黨「家變」囉。Tommy同記者講，當時自由黨喺立法會選舉中受挫，「林健鋒要做主席」，政壇風雲色變，局勢日日有新進展，所以好多香港記者打電話搵佢攞回應。當時Tommy喺意大利旅遊，唔忍心請記者食電話閉門羹，所以，打長途電話覆大家，荷包大出血，張ＩＤＤ帳單最後要用五位數字埋單，尋日提起都牙痛咁聲。
所以，Tommy今個農曆新年去紐約度假，狠下決心熄電話，過一個輕鬆舒服嘅假期。