星爺貴為中銀香港信託董事長兼集友銀行副董事長，測市功力有番咁上下，尋日佢出席團拜時話，退市舉動非同小可，到底點退法、退市有乜後遺症，依家無人睇得通，連經濟大國都係摸住石頭過河，一句講晒就係如履薄冰。佢預測今年股市、匯市都會極之波動，美金波幅相當大，相比之下，投資人民幣穩陣得多。星爺透露，過去兩、三年已逐步增持人仔，數目幾多就唔講嘞，佢睇好人仔長遠有升值潛力，入定些少貨一定無衰。

講到買樓，星爺亦未敢睇好。佢話樓市已升至脫離用家實際負擔能力，意味遲早會出現調整，加上利率處於上升周期，小市民要置業，記緊量力而為。