香港中文大學校長劉遵義退休在即，佢尋日同傳媒講，話退休後依然會留喺中大，仲會夥拍金融管理局前總裁任志剛，喺中大全球經濟及金融研究所做非全職研究，主力研究人民幣發展、人仔國際化對香港的利與弊等，劉校長預言，港幣未來會好似澳門幣一樣，無乜香港人會用！
本身係經濟學家嘅劉遵義話，十幾廿年前返內地消費，間間舖頭啲店員都爭住收港紙，但今時唔同往日，佢班朋友去內地打高爾夫球，畀一百蚊港紙貼士，職員居然唔肯收！職員指明話想收人仔，仲講明港幣兌換麻煩，收番嚟都無乜用喎，港紙倒轉頭畀人歧視，真係風水輪流轉啦。
劉校長話，依家唔少香港嘅舖頭都會收人仔，加上人民幣政策轉變快速，話唔定無幾耐就可以自由兌換，到時香港分分鐘人人都係使人仔，無乜人再用港幣。
對於呢個港幣「被邊緣化」問題，劉校長初步估計唔會對香港經濟做成好大影響，但課題咁大，詳細情況就真係要研究過先知啦！