本文重點
政改方案諮詢上星期結束，政制及內地事務局局長林瑞麟（林D9）終於有機會回一回氣，所以尋日拉埋該局嘅副局、常秘齊齊向傳媒就政改「吹風」，仲幫襯社企買新春曲奇禮盒請人食，不過呢盒曲奇就洩露林D9想緊抓泛民支持政改嘅心願。
跌曲奇露玄機
林D9尋日特別推介一款老虎爪形狀嘅曲奇，仲揸住塊餅畀傳媒影相，點知冷不防有人問佢塊曲奇係咪寓意已抓緊民主黨支持票，林D9聽到竟然手都震埋，連塊餅都攞唔穩差啲跌落地，好彩佢接得住，否則認真大吉利是。佢嘅副局長黃靜文事後笑指林D9太用力抓票，就算塊餅冇跌爛，都可能畀佢揸到裂晒。
外界一直揣測泛民議員喺政改問題上開始作出讓步，而政府要成功游說民主黨支持政改方案再唔係不可能嘅任務，難怪林D9一聽到抓緊民主黨嘅支持票，即時心花怒放到連手都震埋啦。