泛民嘅上京夢有一個咁樣嘅情節，原來早喺上年中，泛民中已經有人搵全國政協常委梁振英（CY）引路，話想打開與北京溝通之門，結果食飽白果。據知當時負責低調接觸CY嘅，係公民黨一位立法會議員，仲話最好可以同京官直接對話添。CY無托手㬹，向中央官員轉達泛民訴求，不過，政改博弈兵凶戰危，民主派要同京官對話，等如獅子開大口，中央梗係唔會咁容易畀佢哋攞彩啦，點都要觀其行、聽其言一段日子，亦都要喺關鍵時刻至出招，咁至有價值。

主要由民主黨為骨幹嘅終極普選大聯盟一方面同公、社兩黨劃清界線，一方面表現得要積極傾出一個佢哋願意投票嘅政改方案，佢哋搵全國人大常委范徐麗泰做北京送信人，表達佢哋好想上京嘅意願，總之唔理見邊位，可以上京就好。不過范太亦非常醒目，佢會見終極普選大聯盟時，就已經聲明佢好願意做橋樑，但大家唔好期望咁大，因為就算佢喺北京開聲，亦未必可以達成泛民朋友嘅願望。

亂噏民記可代中央發言

泛民亂衝亂撞，已經非常心急，唔止行動層面，對住傳媒鏡頭發言，一樣亂咁嚟，貫徹亂石投林呢個主題。「鐵頭仁」何俊仁前日話，願與中央官員交流，就算由民建聯代表阿爺都可以，喺澳門傾都得。你心急，我反而淡定，「鐵頭仁」嘅失言惹嚟民記主席譚耀宗冷嘲熱諷，譚Sir尋日一邊笑笑口，一邊反駁話，民建聯唔係中央代言人，只係香港一個民間組織，而中央政府喺香港嘅代表係中聯辦，叫大家千祈咪搞錯，擺明寸爆「鐵頭仁」。

和諧當然好，但係凡事都要有策略行事，政治嘅嘢，互動關係更加微妙，如果繼續亂石投林，出晒洋相，只有掟親自己，而唔會有一個目標可以掟中。