本文重點
九巴後人伍穎梅（Winnie）含住銀匙出世，人稱「九巴金公主」，但其實呢位公主食嘢好平民化，唔一定要鮑參翅肚。佢最鍾意喺跑馬地一帶搵食，名人成日出沒嘅蓮園係佢熱門蒲點，必食之選係炸兩同埋腸粉。
卓妮早前喺香港明天更好基金活動見到Winnie，提起食嘢佢就好雀躍，極力推介跑馬地成和道蓮園，事關佢喺嗰度做開腳底按摩，按腳前習慣食少少嘢，蓮園嘅炸兩腸粉最啱佢胃口。
四太阿松Eason都捧場
蓮園老闆娘霞姐話畀卓妮聽，佢間舖已經開咗廿三年。佢話好多明星名人都係佢哋捧場客，好似四太梁安琪、前財爺梁錦松都喺度出沒，前灣仔區議會主席黃英琦更加係一個星期要幫襯兩、三次添！
霞姐一副大家姐語氣咁話，歌星陳奕迅（Eason）都成日去食，佢仲睇住Eason長大添！至於呢排成日喺養和醫院出入嘅四太，更加信晒霞姐推介，一坐低就交由佢發落，霞姐畀咩佢就食咩，唔怪得蓮園咁吃得開啦！
卓妮