平機會呢個爛攤子，歷任主席唔係濫用公帑，就係用人唯親，舊年仲畀審計署炮轟佢Ｎ宗罪，個朵花到不得了，要將佢嘅形象起死回生都唔係咁易。啱啱上任為主席嘅林煥光尋日出席一個社企活動時就呻話，新年日日都要開工，冇得出去玩喎。林煥光話，佢由上任到依家，一直冇停過咁滯，工作忙不特止，仲要同社會各界互相認識，建立關係，淨係去social都佔去好多時間。佢承認，舊年審計署炮轟平機會一役，令平機會跌得好傷，佢都希望可以盡快重建市民對平機會嘅信心咁話。