本文重點
鄉議局主席劉皇發去年初加入行會後，呢兩年鄉議局新春團拜十足高官嘉年華，好似尋日喺荃灣如心海景酒店舉行嘅虎年新春團拜，有九成問責高官出席撐場，常秘及署長級官員一樣十隻手指數唔晒。發叔見班高官咁畀面，禮尚往來喺致辭時慨嘆時下為官艱難，已到了動輒得咎，依家唔係「民不聊生」，而係「官不聊生」。發叔咁講，簡直係新年送大禮！
話市民勝在有言論自由
發叔話，現時嘅官員推動政策，要承受各方激烈批評同反對行動，壓力可不小，甚至動輒得咎，「官不聊生」已經取代咗「民不聊生」。事後發叔解讀話：「官不聊生？咪做官難囉，同情官員好辛苦，高鐵（撥款）都睇到啦，啲官坐咗幾日幾夜，所以咪講啲說話鼓勵同安撫吓佢哋囉。其實市民都幾好做吖，有言論自由，隨時都可以發炮！」
不過，發叔無講到點解會「官不聊生」，正如佢去年求嘅車公靈籤籤文話齋，「禍去禍來因自招」，政府施政連番失誤才導致民不聊生，做官嘅責無旁貸，惹來批評正常不過，抵受唔到就應該退位讓賢。
發叔加入行會後收晒火，好少喺團拜同政府「開年」，但有樣嘢發叔講得啱，就係任何人唔應該用激烈同挑釁手段表達意見。
卓妮