本文重點
「光纖之父」高錕奪得諾貝爾物理學獎後，香港嘅學術界立即掀起一陣光纖同科研熱潮，喺政界亦掀起一股抽水效應，當中抽得最勁嘅就首推煲呔曾。煲呔曾早前出席完中文大學為高錕舉行嘅成就展叨光後，近日又約咗幾位「少年發明家」得獎學生到禮賓府會面，然後喺自己個網誌上大作文章，借高錕同班得獎學生，吹噓政府會大力推動創新科技及培育人才。
煲呔曾早前喺施政報告硬銷包括創新科技在內嘅六大產業，立即惹來前科大校長朱經武同港大校長徐立之，連珠炮轟政府忽略同糟蹋科研發展，其中朱經武仲臨別贈言警告政府，話香港隨時被內地及鄰近地區搶去亞太區領導地位。雖然兩位校長苦口婆心，但煲呔曾繼續自我陶醉，走精面借高錕及得獎學生叨光，其實他們嘅成就，政府出過幾多力呢？
送分線器推動科研？
煲呔曾有幾多誠意推動科研發展，可謂路人皆見，好似佢見完班得獎學生之後，每人送咗本高錕自傳《潮平岸闊》同一個港產USB HUB（分線器），話希望學生可以從中得到更多啟發喎。真係好難想像一個USB HUB可以啟發到啲乜嘢，倒不如老老實實、立即喺嚟緊預算案增撥資源畀啲大學發展科研好過啦！