前民主黨成員、油尖旺區議員陳文佑近日無端端被區議會秘書處屈佢係民建聯成員，話說政府嘅區議會網頁，陳文佑嘅「所屬政治團體」一欄，忽然由獨立無黨派變成「民主建港聯盟」，未知係咪秘書處手民之誤。

被同僚開玩笑

陳文佑尋日接受訪問時話，相信區議會網頁已搞錯咗一段時間，事關早前曾經有其他議員笑笑口問佢：「陳議員，你啲政治立場變得咁快嘅？」佢當時冇理會，後來發覺愈來愈多人問佢呢個問題，才發現區議會網頁有錯。

佢怒氣沖沖批評：「我同民建聯嘅思維完全唔一樣，區議會秘書處有乜可能搞錯？如果寫錯咗『塔利班』咪大鑊？分分鐘被警方當係恐怖分子處理。」佢今日會正式去信民政事務局及總署投訴，並在區議會會議上質詢有關問題。