吹氣慳電膽 啤牌 咕

其實煲呔曾呢個低能政府激發咗年輕人唔少創意，例如有大學生設計咗個吹氣慳電膽，煲呔曾搞唔成慳電膽消費券，買番個返去做紀念就啱晒嘞！如果唔想望住個慳電膽觸景傷情，煲呔曾亦可以買副名為「煲呔小心」嘅啤牌返禮賓府，同家務員「肥仔」操啤娛樂吓。肥仔未放完大假喎？咁就買個煲呔形咕返睡房攝高枕頭諗定退休生活囉！

煲呔曾去年底在工展會只係花費一千八百幾元，比前年用超過一萬元大縮皮，佢就好縮骨咁自欺欺人話唔使再刺激經濟喎，都好難期望佢今年行年宵使得多過呢個數目。不過，民政事務局副局長許曉暉（Florence）喺年宵首日一馬當先去社會企業攤檔消費八千元，尋日又再用三百元買福袋，相信會為孤寒兼度縮嘅煲呔曾帶來消費壓力。

許曉暉豪使增添壓力

Florence大力支持社企原本係好事，但佢消費前卻忘記考慮問責團隊因素，即係消費數目對其他官員嘅承受能力。雖然八千元對於一班高官來說唔算多，但總有人唔願意使咁多，煲呔曾會係其中一個，除非佢又厚住臉皮話唔使刺激經濟啫，否則就要焗住使多過八千元。

不過，就算煲呔曾想使錢都未必使得到，事關年宵唔似工展會咁多實用嘅產品選購，取而代之係年輕人有創意嘅精品同玩具，就算買晒八十後為佢設計嘅貼身產品都未必使到八千元，除非買晒所有印上佢嘜頭嘅廁紙返去禮賓府喇，都好嘅，等其他人冇機會用啲廁紙嚟抹呢樣抹嗰樣吖嘛。