沙田區靚女議員龐愛蘭（Scarlett）咁多年嚟身形都保持得好好，完全睇唔出有個十七歲嘅囝囝，原來同佢追求健康飲食有關。Scarlett啱啱榮升傑出青年協會主席，早前首次宴請十三位成員到就嚟結業嘅尖沙咀「名氣廊（Towngas Avenue）」開餐，仲推介大家享用「幸福低碳晚餐」添！
Scarlett一向係名氣廊嘅熟客，當晚佢特登去幫襯留念，因為餐廳所在嘅新世界中心將於本月十五日關閉重建，當日傑青協會委員、富豪集團太子女羅寶文亦在座。廚師幫佢哋設計少煎炸嘅低碳美食，仲即時喺房度炮製添！
佢哋低碳餐前菜有香草煮蜆、番茄伴帶子，主菜有海鮮大召集或雜菜野菌烤鴿子可供選擇，餐湯則有南瓜湯或洋葱湯，最後以令人難以抗拒嘅士多啤梨疏夫里（Souffle）畫上完美句號。尖沙咀嘅名氣廊結業唔緊要，銅鑼灣百德新街仲有一間。
Scarlett不但鍾意食嘢，查實都好有煮嘢天分。舊年佢參加煤氣公司舉辦嘅全港區議員烹飪比賽，就憑一道用蘿蔔、帶子、青豆同魚子炮製嘅「緊扣健康」，奪得最上鏡菜式獎添！