一向好生鬼嘅長實執行董事趙國雄（Justin），衣着品味經常令人有驚喜。尋日長實旗下嘅尖沙咀古蹟活化項目「1881」推出全港獨有嘅光影匯演，卓妮都去趁熱鬧，發現Justin戴咗副好特別嘅木紋框眼鏡，顯得佢更加精靈有型。原來佢趁活動未開始嘅空檔，喺「1881」商場嘅溥儀眼鏡旗艦店買嘅，當係新年禮物氹吓自己開心喎！
Justin話，其實佢睇中兩副眼鏡，心大心細不知揀邊副好，所以特登戴出嚟畀靚女同事幫手揸主意，估唔到即刻畀眼利嘅卓妮發現。佢見同事同卓妮都咁欣賞，轉頭就入番去畀錢，今日有得攞添！
卓妮問佢呢副係咪近視眼鏡，Justin笑住不置可否，仲好搞笑咁形容：「好似我咁成熟嘅人，梗要一副閱讀眼鏡啦！」哈！大家明啦！係老花眼鏡至真！
溥儀嘅靚仔主任Alan話畀卓妮聽，Justin嘅新歡係法國老牌子OGA Plus，香港人俗稱「貓嘜」，售價約四千八百元。佢嘅特色係全手工打造，襯到個人醒目啲。難怪Justin一見鍾情啦！
卓妮