正所謂「名師出高徒」，師承幾何學家陳省身嘅國際知名數學家丘成桐，將獲頒發○九年沃爾夫數學獎，係繼陳省身後第二位獲頒呢個獎項嘅華人。中文大學數學科學研究主任丘成桐，現時身在哈佛大學擔任講座教授，佢將於五月十三日親身前往以色列耶路撒冷領獎，與另一名同時獲頒數學獎嘅美國教授分享十萬美元（港幣七十八萬元）獎金，由以色列總統頒發獎項。
丘成桐七六年已解決咗「卡拉比猜想」（Calabi Conjecture），其方法應用喺超弦理論中，八二年獲頒菲爾茲數學獎，今次獲頒嘅沃爾夫數學獎，評審委員會讚揚佢喺幾何學研究，對日後幾何學及物理學有深遠影響。沃爾夫獎創立於一九七六年，每年頒發予醫學、物理、數學、農業等領域嘅傑出人士，一向為數學界所重視，所以丘成桐奪此獎確為華人爭光。