解決三大難題

建制派杯葛「五區公投」補選，希望令「公投」行動失敗，如意算盤係咪打得響，要睇過至知，不過，即時紓緩咗陣營內嘅三個頭痛問題，就係不爭事實。

首先，如果建制派全面迎戰，民建聯同自由黨依家肯定為協調出選打崩頭，其中又以新東、新西爭持最激烈，眾所周知，自由黨分別想以前主席田北俊及其胞弟田北辰強勢出擊，但民記就好想為第二梯隊嘅葛佩帆同陳恆鑌練兵，唔想幫田少兩兄弟任何一人抬轎，喺咁嘅情況下，居中協調者順得哥情失嫂意，苦無解決良方，頭痛欲裂。如果唔係公社兩黨一句「全民起義」大大刺激中央政府神經，促成全面杯葛補選對策，各黨為咗協調食幾多粒止痛藥都唔掂。

五區補選大戰，另一班頭痛嘅人係民建聯最高層。民建聯內對應否參與補選一直有分歧，主張杯葛一派嘅擔憂，係若然建制派參選，必須協調以最強實力出戰，民記難免要為自由黨或其他黨派參選人抬轎，借兵助選。○七年港島補選一役，民建聯為前高官葉劉淑儀助選，借用嘅選票如潑出之水，一去無回頭，今次五區補選，民記欲「霸」不能，無可能霸晒五區，但係要喺新東為田少助選，你估民記唔驚壯大咗田少、二○一二年反害咗自己呀？依家建制派唔玩，民記主張杯葛一派鬆一口氣。

建制派杯葛補選已成定局，早前部署喺泛民手中搶回兩至三個議席、令政改方案有望夠票通過嘅大計幻滅，最開心應該係一班建制派保守力量同商界人士嘞，事關佢哋一直反對取消功能組別，當二○一二年政改又原地踏步，到二○一七年，佢哋有大條道理反對一步到位普選特首，而喺循序漸進原則緊箍咒下，廢除功能組別又再行慢一步，你話佢哋點會唔拍爛手掌？

所以話，一招杯葛補選，製造咗多贏局面，事到如今，最落寞嗰個相信係煲呔曾，政改過唔到，玩鋪勁承諾變開空頭支票，任期結束一事無成！