今年過年有乜嘢好節目呢？啱啱遇着剛剛，虎年新正頭大年初一撞正二月十四日情人節，雖然表面上相當浪漫，不過諗諗下其實都幾頭痕。喂，假如你係全情投入求戀期嘅風流才子俏佳人，情人節梗係希望孤男寡女乾柴烈火o架啦，點不知又要熱熱鬧鬧去拜年喎，三姑六婆叔伯兄弟姨媽姑爹氹氹轉，轉到乜嘢浪漫氣氛都冇晒。

當然啦，年三十晚手拖手行年宵，未嘗唔係另一種浪漫，一踏入十二點就係情人節，到時咯喎，任你郎情妾意山盟海誓，情到濃時仲可以順手買花贈嬌娃，幾盞鬼o架。

咦咦咦，你都咪話後生仔女冇腦，聽講今年嘅年宵攤檔好搞嘢，出咗好多古靈精怪嘅得意產品。譬如話，有一批八十後年輕人將滿腔怨氣轉化為創意作品，大賣「煲呔虎」咕，任你搓圓撳扁發洩一番。又有後生仔女創作「武虎腦」吹氣頭套，寓意將經濟不景以及豬流感拋諸腦後迎新年。

其中一個年紀輕輕嘅檔主仲話，八十後唔一定係激進分子，未必要上街示威嘅，埋怨失業難搵工嘅時候，亦都可以主動嘗試創業，累積寶貴嘅工作經驗。

呢嗱嗱嗱，態度絕對正確，精神十分可嘉。就以「煲呔虎」為例，呢個好吖，簡直頂呱呱，一來係創意發揮，二來又可以賣錢，最重要嘅係，買家任打任掟發洩心頭之恨，一家便宜兩家着。

「煲呔虎」點解咁抵打？冇辦法，痛心疾首，痛心特首，失業問題長期存在，貧窮大軍水深火熱，吖，死得佢吖，曾蔭權由始至終攞唔出解決辦法，最慘係施政報告裏面連「扶貧」兩個字都冇勇氣寫落去。至於講到政治方面嘅深層次矛盾，更加冇眼睇，反對派嘈喧巴閉，建制派喧巴嘈閉，總而言之煩不勝煩巴巴閉閉。

其實，後生仔女如果真係夠創意，仲有其他得意傑作可以諗諗佢。嗱，等功夫茶提供兩個別開生面嘅建議。

建議一：精心創製「特衰政虎」吹氣公仔。政虎政虎，寓意苛政猛於虎，你只要買一個特衰政虎吹氣公仔返屋企，你就可以拳打腳踢大報復。

建議二：巧手研造「禮賓虎」。你知啦，禮賓府門高狗大，包圍抗議又冇用，嘗試衝擊又唔得，你又唔係家務員親朋好友，冇辦法入去胡天胡帝燒雞翼，你唯一可以做嘅係利用「禮賓虎」過過癮，興之所至，任打唔嬲！

明白未？人最緊要食腦，苦中可以作樂，如果你虎年唔想再受苦，不妨試試扮演武松打虎，怒打禮賓虎嘅作用應該同鵝頸橋打小人差不多。