將畢生奉獻畀芭蕾舞嘅王仁曼，尋日獲英國皇家舞蹈學院頒發院士銜頭，成為亞洲首位舞蹈家獲此大殊榮，大會喺四季酒店舉行頒授儀式，王校長拖埋老公同千金陳靜儀分享喜悅，一班追隨佢多年嘅高徒亦聞風而至，葉太都賞面到賀。

葉太自爆囡囡榮欣五歲就跟王仁曼學跳舞，一學五年，不過葉太笑言對芭蕾舞興趣唔大，未有拜師衝動。

但講到睇京劇，佢就非常雀躍，第一時間打開個豹紋銀包掏出六張京劇戲飛。原來葉太去年北上梅蘭芳大劇院及北京國家大劇院睇賀年京劇，佢話新年多數上演《龍鳳呈祥》等劇目，睇到觀眾拍爛手掌。

睇真啲，每張戲飛高達二千幾蚊人民幣，葉太睇足六場，有數得計，好彩啲飛有人送贈毋須破費，不過今年新年佢又戲癮發作，會上京再睇。