亞視控股股東查懋聲上個月高調召開記者會，首度開腔回應有關亞視股權鬥爭，由於佢做咗亞視股東以嚟一直行事低調，甚少喺公開場合現身，所以佢一話召開記者會即刻吸引到大批傳媒到場採訪，估計當日現場最少有三、四十名中外記者，場面墟冚。
有關亞視股權問題嘅報道，到今日已經過咗氣，但係當日曾到場採訪嘅記者，近日相繼收到查懋聲發出嘅親筆簽名答謝信，內容大致係感謝記者朋友到場採訪，又多謝傳媒機構關心佢喺亞視嘅投資咁話。
查懋聲當日表明正同三個買家傾緊入股，但佢一早講明亞視無論點變，新聞編採都會係獨立自主，佢喺封答謝信都特別關心傳媒報道新聞嘅手法，佢有感而發話，傳媒對人嘅生活影響好大，所以更需要傳媒以多角度反映唔同觀點向讀者報道。
查懋聲曾經患上癌症，結果完全康復。佢嘅來信不但語重心長，而且人情味十足，唔知佢對待員工，係咪都一樣咁有人情味呢？