議員對問題有不同意見好平常，不過喺尋日嘅財經事務委員會會議上，一向笑騎騎嘅經濟動力立法會議員林健鋒竟然同民主黨議員涂謹申喺言語上火併，雙方都扯晒火，實在十分罕見。話說Jeffrey自言了解過恒指報價故障事件後，認為呢個只係電腦程式出現問題，唔涉及人手操作不當又或者病毒入侵等問題，加上今次事件冇造成嚴重嘅交易問題，所以覺得都係先睇完報告結果，委員會先再定下一步點做。

橄欖做和事老

點知Jeffrey呢個大事化小嘅態度激起阿涂把火，阿涂提出極度挑釁嘅質疑：「我見林議員好似有埋份報告咁，又話技術有問題，如果有資料不如畀埋我哋啦。」

Jeffrey聽到阿涂咁講，好似㩒正佢嘅痛處一樣，當堂黑晒面仲好大聲反駁：「我希望同事擘開隻耳聽嘢，唔好亂咁噏！」佢強調自己冇講過阿涂指控嗰番話，之後仲句句有骨單打阿涂「瞓緊覺唔清醒」，結果雙方鬧到話要睇番會議嘅逐字紀錄，最後要由委員會主席陳鑑林做和事老，勸佢哋唔好拗先平息呢場無謂火併，而委員會最終決定將恒指報價故障事件擺埋落下次會議議程。

其實委員之中唔止Jeffrey一個話要先睇報告後開會，好似民建聯黃定光亦認為今次屬偶然事故，所以委員會冇急切性要夾硬喺下次會議加多項議程討論恒指事件，而商界立法會議員黃宜弘仲話以佢四十幾年買賣股票嘅經驗，一般人唔會單睇恒指就下投資決定，直情覺得委員會唔使就此事開會添，總之幫口平息風波嘅議員大有人在，不過阿涂就特別要挑戰林健鋒！