咪住咪住，功夫茶之所以咁後知後覺，家陣先至知道有一個青年廣場，其實係反映咗一個殘酷現實，有關當局宣傳不足。呢嗱嗱嗱，本報記者喺辦公時間去過現場巡視，結論係，吹脹咯，十室九空！

不如咁啦，先睇睇最初點解要動用七億幾公帑興建青年廣場。一九九八年喎，當時嘅特首董建華宣布，將柴灣社區中心改建為「超級青年中心」，內設商場、會議中心同埋青年旅舍等等，建築費耗資七億五千萬元。青年廣場樓高十四層，希望可以作為青年創業以及活動嘅基地。你知啦，老董份人好有創意㗎，乜乜中心物物港都畀佢諗得出，不過大部分胎死腹中咁解之嘛。難得有一個中心由幻想變成事實，簡直還得神落。

之不過咁，興建過程唔係咁順利，原本計劃○四年落成嘅，點知去到○三年，一場沙士瘟疫害到經濟環境大逆轉，工程幾乎爛尾。政府當時評估，中心冇辦法自負盈虧，啟用頭十年內甚至可能出現每年二百萬元虧蝕，所以工程暫停。後來，政府決定將「有限公司運作模式」改由民政事務局全盤負責，萬一出現虧損，政府埋單包底，工程先至可以恢復咋，終於喺○九年搞掂，正式命名為青年廣場。

講到呢度，唔知應該讚立法會議員有先見之明好吖，定係應該彈佢哋監管不力。事關青年廣場申請撥款期間，曾經有議員質疑成個計劃係「大白象」，即係昂貴得來又浪費。家陣回頭望過去，哈，確實又係大白象喎，你話嘞，未卜先知嘅議員係咪好勁？同時，通過撥款嘅議員係咪好笨？

點都好啦，米已成炊，唔通你搵人清拆重建咩，睇下有乜辦法改善十室九空嘅殘局好過。

青年廣場二、三樓主要係零售設施，叫做生活館，分別有二十四個「車仔舖」以及三十六間店舖。另外仲有展覽平台、劇場同埋綜藝館。樓上係辦公室樓層，最高數層係旅舍。

好嘞，點解有咁新簇簇嘅設施都冇人租用嘅呢？唔通後生仔女唔肯創業做生意，係都要去包圍立法會？唉，死因係惡性循環，首先係冇人流，一日唔知有冇十個人行過，冇人流就要拍烏蠅，拍得烏蠅多，租戶自然打退堂鼓，一旦冇人開檔做生意，人流當然更加買少見少，鬼都唔齁你啦！

計功夫茶話齋，雖然名義上唔係「有限公司運作模式」啫，實際上可以利用私人企業嗰一套。即係咁，出盡九牛二虎之力瘋狂宣傳賣廣告，賣到街知巷聞，只要吸引到大批人流，一定有人開檔做生意，惡性循環就可以打破。如果唔係，呢隻死氣沉沉嘅大白象注定漚臭都得咯！