香港青年協會尋日邀請政務司司長唐英年（唐唐）出席政制發展分享會，搵咗二百幾個青年直接向唐唐反映政改建議。青協今次畀晒機會唐唐，等佢可以同青年人真情對話，之不過個幾小時嘅分享會上，佢大部分都係官腔答法無新意，最弊係開口夾着脷，政改方案諮詢仲有三星期就完，佢竟講成「仲有三小時就完」，佢對政改諮詢有幾上心真係可想而知。
尋日班「八十後」向唐唐提出嘅問題都真係幾有水準，好似有個學生問佢：「假如你二○一二年參選特首，有六百五十個選委要求你支持一個方案，但有六百五十萬市民反對，你會如何取捨？」唐唐當堂口窒窒咁話：「如果……如果……如果我選特首……」之後又即時改口話自己依家只會做好政務司司長工作，所以同學嘅問題係唔會產生喎。
其實唐唐都唔係第一次開口夾着脷，好似之前有酒店突然結業，大批旅客被迫寄居社區中心，唐唐當時就好輕佻咁形容班旅客「條條fing」，之後又試過中英文協調出現問題，將昂坪３６０吊車直譯為「三碌齡」，搞到貽笑大方。