做咗一年零三個月就辭職嘅公民黨前立法會議員陳淑莊（Tanya），尋日第一次以前議員身份亮相，出席港大政制發展論壇。點知佢乘機推銷「五區公投」，講講吓學生主持覺得唔對路，惟有好客氣咁截停佢，提醒佢講番政改方案，Tanya先至乖乖就範。
自從Tanya決定辭職後就好當黑，先係辦事處畀人離奇爆門，繼而跟樂施會去內地宣傳後一直作病，直至辭職後成個人一鬆落嚟，就發燒兼喉嚨痛。前日係Tanya最後一日議員生涯，當日佢收到政府五封回信，回覆佢早前以議員身份追問政府問題。Tanya話可能政府內嘅有心人知佢就快辭職，專登早啲覆信，令佢好感激。
