人稱「沙士英雄」嘅中文大學候任校長沈祖堯，早前力撐「八十後」表達意見積極而非激進後，似乎意猶未盡，尋日出席寧波第二中學畢業暨頒獎禮時再論「八十後」。沈教授話，年輕人對社會承擔好重要，總好過關心娛樂新聞或茶杯裏風波的消息，但佢強調「表達意見時應遵守法治」，仲要好似中大生咁有獨立思考，經過思考及論證才對社會時事作出評價。
沈教授估計，「八十後」之所以有訴求，皆因○九年畢業生較十年前嘅薪金還要低，成為埋怨社會嘅聲音，但佢勉勵年輕人話，每創造一件事物，都要經過萬次失敗才能成功，要懂得承受挫折，對前途有夢想。
講番尋日個畢業暨頒獎禮，一眾寧波同鄉齊撐場，除咗校監李宗德外，仲有前行政會議成員范鴻齡（Henry）、其士集團主席周奕卿等，Henry與家姐人大代表羅范椒芬喺家鄉寧波辦學有聲有色，寧波第二中學搞活動，佢當然踴躍支持啦！