琳琳去年九月於威爾斯親王醫院出生，為鄭氏夫婦第一胎，因身體較弱而需留院接受護理。去年十一月中，鄭父前往探望女嬰時，赫然發現女兒右手中指被包上膠布，追問下始知一名健康服務助理以剪刀為其女剪指甲，不慎「剪多咗」而即時血流如注，「我都知依家醫護人員好忙，但無論點都應該第一時間話畀我知！」鄭父拆開膠布查看下，發現傷口頗深，「唔單止冇咗指甲，仲見到囡囡手指『平咗』，冇咗啲肉，真係好心痛！」

肥上瘦下 做到氣咳

鄭父事後要求院方書面道歉及透露涉事助理身份，但遭拒絕，「醫院好似好想隱瞞件事，如果佢（醫護人員）知道做父母嘅心情，就唔會搞到件事咁僵！」雖然事隔多月，但鄭父仍堅持為女兒取回公道。

「雖然細路仔多數唔會記得四歲之前發生嘅事，但係身為醫護人員就真係要小心啲！」本身為兒科專科醫生的醫學會會董馮宜亮認為，任何牽涉照顧嬰兒的工序，都必須加倍留神，「尤其係BB肚餓嗰陣會周圍郁，剪指甲嘅時候就要好小心，好易會搞到流血發炎！」馮又指事件亦凸顯公立醫院肥上瘦下問題，前線人員因為做到「氣咳」而無暇細心照顧每名嬰兒，促重新檢討公立醫院的架構，「如果減咗一個高層，將啲錢請番多幾個前線員工，情況已經唔同晒！」

威院一名健康服務助理被揭發剪傷女嬰手指。

琳琳九月在威院出生，曾留院多月接受護理。

父母追問始作解釋

病人互助組織聯盟副主席張德喜亦認為，公立醫院持續人手短缺，類似問題將陸續有來，張建議醫護人員加強與家屬溝通，病人一旦發生事故，應盡快通知家屬以示尊重，而非在父母發現後並追問時才作解釋。

威院發言人證實，該名健康服務助理為女嬰修剪指甲後，發現女嬰皮膚出現輕微流血，已立即向當值護士匯報並適當處理傷口。當值醫生其後獲悉事件，翌日已安排骨科專科醫生為女嬰檢查傷口，證實情況良好，並致電女嬰父親解釋及道歉。事發後該院亦已訓示有關助理，日後遇有同類情況，不應自行為嬰兒修甲。

■記者 梅可茵