咁就奇怪嘞，點解申訴專員黎年狠批醫管局同衞生署行政失當，話佢哋冇核實求診人士身份證有冇過期呢？哦，明白嘞，功夫茶就話土生土長啫，所以身份證係永久性，原來入境處會發出另外幾種非永久性居民身份證，譬如來港求學或者投資人士，留港日子一屆滿，身份證就變咗過期。

明白明白，抵鬧抵鬧，醫管局同衞生署確係離晒大譜。係人都知香港嘅公立醫院有兩種收費制度，本地居民因為有補貼，所以收費便宜，非本地居民就要交足全費。舉個例，住院服務本地居民收一百元，交足全費就要三千三百。

根據申訴專員公署估計，截至○九年七月，留港期限屆滿嘅身份證持有人已經多達二十二萬。好嘞，你唔核實求診人士身份證有冇過期吖嘛，全部慷納稅人之慨一視同仁，即係浪費公帑補貼「過期港人」，牽涉款項大拿拿幾千萬甚至以億計。

更加可惡嘅係，黎年踢爆政府其實早於八年前已經察覺問題存在，竟然一直錯而不改。你知啦，任得過期港人享用廉價醫療服務，即係加重醫護人員工作負擔，間接剝削本地居民應有權益。

喂喂喂，咪住先，大家轉頭望一望，幾十個護士協會嘅代表尋日去醫管局抗議，不滿護士人手長期不足，控訴醫管局未有正視護士流失率偏高。護士協會仲話，公立醫院平均每名護士要照顧十至十二名病人，忙到甩轆。

你話死唔死？護士已經人手不足嘞，聽講醫生更加忙到一頭煙，你仲瞇埋眼大開中門，縱容持有過期身份證嘅病人湧去求診？嘥錢已經抵踢屁股，萬一忙中有錯搞出人命，係咪搵食衞局局長周一嶽填命呀！

話時話，諗諗吓可能呢個憂慮根本就係事實，醫療事故多如牛毛，一時又話打錯針，一時又話輸錯血，兩個ＢＢ身份對調都夠膽死發生嘅，醫管局發雞盲胡亂收診應該係罪魁禍首。

唉，根據申訴專員嘅講法，核實身份證嘅方法其實易過借火，好似勞工處、房屋署以及社會福利署，呢班官僚唔見得聰明過人，一樣分辨得出邊張身份證過期。方法係乜呢，請問？講出嚟真係笑死你，一對人手，一對人眼，就係咁簡單。所以黎年好無奈咁話，人哋都識得人手核實身份證咯，唔明白醫管局同衞生署有乜嘢困難。

如果大家認為唔識人手核實已經蠢過隻豬，以下嘅官式反應更加會笑到你歪嘴歪鼻甩下巴。食衞局發言人話喎，接納申訴專員建議，成立跨部門小組研究，短期內探討人手核實非永久性居民嘅證件。

你話係咪蠢到無可救藥吖？叫你用最原始嘅方法人手核實啫，又唔係叫你發明高科技飛機大炮，使唔使左研究右探討，仲要跨部門咁大陣仗呀！

計功夫茶話齋，周局長嗰張身份證應該未過期，不過有機會啪咗過期春藥，所以醫療系統搞到亂七八糟！